Unha persoa resultou ferida tras producirse unha explosión, que posiblemente se corresponda coa dun aerosol, no interior dunha vivenda da Avenida Portomarín, na localidade de Chantada.
Poucos minutos antes das 14,00 horas, os Bombeiros de Chantada chamaron ao 112 Galicia para dar aviso do sucedido. O CAE-112 alertou aos servizos médicos, aos axentes da Garda Civil e da Policía Local e a Protección Civil.
Ao final da intervención no lugar, a dotación dos Bombeiros comunicoulle ao 112 que unha persoa, que afirmaba estar a limpar no interior da vivenda con aerosois, resultou afectada con queimaduras nun brazo e nunha perna, como consecuencia dunha posible deflagración dos mesmos.
Ademais, tamén se orixinaron diversos danos materiais na estrutura da casa, de maneira que chegou a desprazarse un tabique e romperon as xanelas.