Unha intensa treboada asolaga Sarria

No corredor Lugo-Monforte ó seu paso por esta cidade tamén se viviron momentos de nerviosismo por mor da forza coa que caía a auga. Os condutores víronse obrigados a reducir a velocidade e houbo momentos de pánico.

Centro de Sarria alagada / Héctor

Á última hora da tarde do domingo 15 de xullo, unha intensa treboada anegou as rúas de Sarria.

Dende que comezou o fenómeno meteorolóxico a intensa choiva, acompañada de gran cantidade de raios  e tronos, converteu a vila nunha balsa de auga. Rúas anegadas que dificultaron a circulación do tráfico en moitos puntos, tapadeiras de rexistros que se levantaron pola presión da auga e canles improvisadas polas beirarrúas fixeron que o día de lecer se convertese nun pesadelo para moitos. Todo isto provocou que moitos garaxes de vivendas quedaron anegados.

Mentres tanto, no Corredor Lugo-Monforte ó seu paso por Sarria tamén se viviron momentos de nerviosismo e perigo. Debido á forza coa que caeu a auga os condutores víronse obrigados a reducir a gran medida a súa velocidade. Durante un bo rato, os automóbiles da vía non puideron sobrepasar a velocidade de 50 quilómetros hora mentres rodaban por un asfalto incapaz de absorber toda a auga que estaba a caer nese momento. A auga caeu con tanta intensidade que a visibilidade era practicamente nula nalgúns tramos.

Dende AEMET (axencia estatal de meteoroloxía) destacan que as tormentas van continuar na comunidade. Para o domingo estaba activado o nivel de alerta amarelo pola previsión de treboadas acompañadas de auga e granizo.

 

DEIXAR UN COMENTARIO

Please enter your comment!
Please enter your name here