Os profesores decidiron retomar as clases no colexio Frei Luís Granada de Sarria despois de que este luns fora suspendida a actividade lectiva por mor das obras que se acometen no centro e que levaron ao apuntalamento do edificio. Porén, tan só o 20% do alumnado matriculado acudiu a clase na xornada deste martes.
Por parte da Xunta de Galicia insístese en que a seguridade está “garantida”, como lles trasladan os técnicos da obra que, pola presenza de “gretas”, optaron por apontoar a “parte baixa do edificio e unha aula”, indicaron. Ademais, tamén se instalou un valado “por protección” na zona de maior risco
Estes mesmos técnicos encargados dos traballos destacan que o centro “non corre risco estrutural” e, por tanto, a “seguridade está garantida” para os pequenos e profesores, insisten as mesmas fontes.
REUNIÓN INFORMATIVA
A dirección do centro convocou os pais e nais a unha reunión que se celebrará esta tarde co obxectivo de dar información sobre a situación do colexio.