Solución para ‘Ponte Ribeira’ en Sarria

Este venres 19 de xuño presentouse en Sarria a proposta do Equipo de Goberno para dar solución á Ponte Ribeira e a súa contorna. O acto contou coa asistencia do Presidente da Confederación Hidrográfica do Miño Sil (CHMS), don José Antonio Quiroga, e do Presidente da Deputación Provincial de Lugo, don José Tomé.

Encontro de José Tomé con Claudio Garrido. Foto: Prensa Deputación de Lugo

José Antonio Quiroga, Presidente da Confederación Hidrográfica do Miño Sil, tratou co alcalde, Claudio Garrido, o avance dos trámites administrativos tendentes a conseguir a autorización para executar o proxecto da “pasarela metálica provisional para Ponte Ribeira”, dando deste xeito continuidade ao traxecto orixinal do Camiño de Santiago. O devandito proxecto atópase en trámite de Información Pública e pode consultarse nas oficinas do CHMS en Lugo, tal como se publica no BOP de Lugo de 12 de xuño de 2020.

Así mesmo, Quiroga comprometeuse a elaborar un estudio que permita a rehabilitación da parte alterada da ponte medieval para deixar á vista a fábrica orixinal de “Ponte Ribeira”.  “Temos que ser conscientes do patrimonio cultural asociado ao mundo da auga da que dispoñemos en Galicia e, por iso, dende a CHMS apostamos por manter as vías orixinais sen obviar a normativa de augas”, matizou o presidente.

COMPROMISO DA DEPUTACIÓN DE LUGO

O Presidente da Deputación e o Alcalde de Sarria asinaran un protocolo co fin de restituír o acordo de colaboración que existía entre a Deputación de Lugo e o Concello para a Ponte Ribeira. “Naquel momento comprometinme co alcalde a formalizar neste ano 2020 un convenio semellante ao que perdeu vixencia sen que fosen executadas as obras”, lembrou José Tomé este venres no encontro con Claudio Garrido.

Así, pois, a visita a Sarria de Tomé confirma a formalización do seu compromiso. “Neste novo convenio de colaboración que asinaremos en breve mantemos a mesma achega económica que no anterior, son 150.000 euros, un investimento importante que terá tamén un impacto moi importante para Sarria”, subliñou.

O PROXECTO

O proxecto executarase en tres fases: 

1-Construción de plataforma provisional para paso de peóns/peregrinos e vehículos, incluídos autobuses, nunha soa dirección. Así liquídase a situación que vimos padecendo desde 2014.

2-Reconstrución, rehabilitación e recuperación da Ponte Ribeira sen formigón.

3-Execución dunha vía de circulación que comunique a Rúa do Peregrino coa Rúa Celso Emilio Ferreiro para o tráfico rodado. Toda esta actuación transformará esta zona nun gran espazo aberto e moderno combinando os valores patrimonial e ambiental.

Podedes ver aquí a recreación gráfica que difunde o Concello de Sarria na súa páxina de Facebook.

Hoxe presentouse a materialización da Proposta do Equipo de Goberno da solución para Ponte Ribeira e a súa contorna, coa asistencia do Presidente da Confederación Hidográfica do Miño Sil, don José Antonio Quiroga e do Presidente da Deputación Provincial de Lugo, don José Tomé. O proxecto executarase en tres fases: 1*._ Construción de plataforma provisional para paso de peóns/peregrinos e vehículos, incluídos autobuses, nunha soa dirección. Así se liquida a situación que vimos padecendo desde 2014. 2*._ Reconstrución, rehabilitación e recuperación dá Ponte Ribeira medieval, sen formigón. 3*._ Execución dunha vía de circulación que comunique a Rúa do Peregrino coa Celso Emilio Ferreiro para o tráfico rodado. Toda esta actuación transformará esta zona nun gran espazo aberto e moderno combinando os valores patrimonial e ambiental (fixádevos no último fotograma).#concellodesarria #camiñodesantiago #ponteribeira

Publicada por Concello De Sarria en Viernes, 19 de junio de 2020

 

DEIXAR UN COMENTARIO

Please enter your comment!
Please enter your name here