Teatro de maiores na Pobra do Brollón e de alumnos dos centros de ensino en Monforte

En Monforte dan comezo este xoves as representacións do XXVIII Certame Municipal de Teatro e o Centro de Día da Pobra do Brollón celebra con teatro, o seu X aniversario

Teatro A Pobra do Brollón / Concello da Pobra do Brollón

A primeira cita co Certame Municipal de Teatro para Centros de Ensino de Monforte será este xoves, día 25, na casa da cultura a partires das 20.00h, cos alumnos e alumnas da aula de teatro do CEIP Monforte, que representarán a obra “A unión fai a terra“, peza dirixida, coordinada e adaptada por Paqui Abeledos, a partir do texto do mesmo título de Macu Sanz.

A segunda das representacións do XXVIII Certame Municipal de Teatro terá lugar o venres 26 de abril a partir das 20:00h no salón de actos da Casa da Cultura. Os alumnos e alumnas do grupo de teatroA Pinguela 2019“, baixo a dirección de Paqui Abeledos, representarán a obra “Lingua de lata“, adaptación de Francisco Oti e Julio Fernández.

O luns 29 de abril ás 20:00 hna Casa da Cultura, o Colexio Ferroviario porá en escena a obra “Bar Manolo”, baixo a dirección de Sabela González Chas e Juan José Diéguez López. As representacións continuarán no mes de maio.

Cartaz Monforte TEATRO

O Centro de Día da Pobra do Brollón celebra o seu X aniversario

No 2009 abría as súas portas o Centro de Día da Pobra do Brollón. As instalacións con capacidade para 40 persoas, contan na actualidade con 23 usuarios dos concellos da Pobra do Brollon, Monforte de Lemos e Ribas de Sil. Traballan no Centro de Día, unha terapeuta ocupacional, unha traballadora social, 6 xerocultoras e persoal de servizos xerais, ademais da fisioterapeuta e a sicóloga que prestan servizo tres días á semana.

No día a día do centro desenvólvense actividades de ximnasia, estimulación cognitiva, música, xogos, saídas a coñecer a contorna, actividades interxeneracionais,…
Este mércores, a axenda habitual modificouse para adicar o día á celebración do X aniversario, contando coa presenza do xerente adxunto do Consorcio Galego de Servizos de Igualdade e Benestar e representantes do equipo de goberno municipal. Ás 12.00 da mañá comezou a recepción de participantes, para posteriormente ofrecer unha representación teatral por parte dos usuarios do centro; presentouse a mostra fotográfica dos 10 anos de andaina e entegáronse premios aos 3 usuarios que levan no centro desde o comezo. Ás 13.00 houbo uns pinchos e ás 16.00 actuou Cé Orquestra Pantasma.

O alcalde, Xosé Lois Maceda, destacaba a importancia do Centro de Día para o Concello da Pobra do Brollón, “Despois do traballo que custou poñelo a funcionar estamos encantados de celebrar estes 10 anos. O servizo reforza toda a nosa política social de apoio aos maiores e ás familias. O Concello puxo o edificio a disposición do Consorcio e cada ano adicamos 20.000 euros a este servizo, ademais de encargarnos do mantemento do centro. Trátase dun modelo de colaboración entre administracións que redunda no beneficio dos nosos maiores.”

Teatro A Pobra do Brollón / Concello da Pobra do Brollón

DEIXAR UN COMENTARIO

Please enter your comment!
Please enter your name here