O chantadino Pazo de Sabadelle inaugura o próximo sábado día 8 ás 20:30 a mostra artística “Cobertores de emocións, pan e chocolate”. Esta exposición contén unha serie de obras plásticas creadas por Beatriz Palomero, Miguel Anxo Macía e Xosé Manuel Rodríguez “Moxom”. Aqueles que estean interesados en visitar estas creacións poderán facelo ata o día 31 de outubro, xa que permanecerán expostas nas diferentes estancias do pazo.
O acto da inauguración reunirá non só aos artistas que expoñen as súas pezas, senón tamén a creadores doutros ámbitos e disciplinas. Os poetas Mónica Sánchez, Quco Valeiras e Eva Xanin levarán a cabo un recital e Mad Mission, Daniel do Pando e Searas poñerán a nota musical nun evento único no sur de Lugo.
O cartaz da exposición foi deseñado polos alumnos de plástica do instituto chantadino IES Val do Asma. Baixo a coordinación da profesora Lola López realizaron unha creación conxunta para anunciar esta mostra.