O Concello de Monforte presenta un “Verán Cultural” con cine, exposicións e concertos

O prato forte do verán serán as actividades dentro do ciclo "Cultura no Camiño 2019", que inclúe espectáculos de maxia e musicais.

Vista ó río Cabe ó seu paso por Monforte dende a Ponte Vella / XdL

O Concello de Monforte vén de anunciar o programa do “Verán Cultural”. Trátase dun conxunto de actividades culturais, lúdicas e festivas que terán lugar dende principios de xullo ata finais de setembro. Segundo sinala a Executiva local, puxo fincapé en que houbese eventos para todos os públicos e en que tiveran presencia os artistas monfortinos, para que poidan “expresar a súa creatividade artística diante dos seus veciños”.

O alcalde de Monforte, José Tomé, destacou a importancia de programar actividades durante esta época do ano “na que recibimos un maior número de visitantes”. Deste xeito, o obxectivo principal do Concello é estimular a economía local.

No eido da música destacan o Festival da Ribeira Sacra, que terá lugar en diversas localizacións entre o 18 e o 21 de xullo; o Festival Carude Rock, que se celebrará o 9 de agosto na Praza de Carude; e as actuacións de artistas como Doc Magoos (10 de agosto), Garufa Blue Devils Big Band (11 de agosto), Os Parentes (12 de agosto) e David Prado e Sr. Jingles (24 de agosto), todos eles promovidos pola Deputación de Lugo.

Tamén se reeditarán outros eventos moi esperados polo público monfortino, como o Fancine de Lemos (do 25 ao 28 de xullo), a mostra de artesanía Artelemos (do 3 ao 7 de agosto) e a Feira do Libro (do 28 ao 31 de agosto).

Cartaz do Verán Cultural 2019 / Concello de Monforte

DEIXAR UN COMENTARIO

Please enter your comment!
Please enter your name here