A figura de Prisciliano: un disidente nas raíces de Gallaecia

O venres 19 de xullo terá lugar en Quiroga a presentación do libro "Prisciliano. Vida y muerte de un disidente en el amanecer del Imperio Romano", do historiador e arqueólogo asturiano Diego Piay.

Diego Piay Augusto / Cedida

A Asociación Cultural “Souto do Val” organiza o venres 19 de xullo a presentación do libro Prisciliano. Vida y muerte de un disidente en el amanecer del Imperio Romano. O evento terá lugar na Casa da Cultura de Quiroga ás 20:30 e nel intervirá o autor, Diego Piay Augusto. Estará acompañado por Xosé Estévez, historiador e profesor emérito da Universidade de Deusto.

Sobre a enigmática figura de Prisciliano e a corrente que este creou aínda existen moitas dúbidas. Diego Piay é profesor de Historia Antiga na Universidade de Oviedo e unha das súas liñas de investigación é precisamente o priscilianismo e a arqueoloxía cristiá. Falamos con el para coñecer máis de preto esta figura histórica.

Pódenos falar un pouco máis polo miúdo de que tema trata o libro que vai presentar en Quiroga?

Este libro é unha biografía histórica sobre Prisciliano de Ávila, unha figura fundamental para coñecer a Historia Romana de Occidente do século IV D.C. Trátase dunha figura bastante coñecida non só en Galicia, senón en toda Europa, pero nesta comunidade é máis sinalada porque hai quen a vincula coa tumba do Apóstol Santiago.

Que diferencia este libro da literatura que xa existía sobre Prisciliano?

O certo é que xa existían moitas obras sobre el, pero eran principalmente artigos que trataban aspectos moi cocnretos da súa vida ou monografías sobre Historia Antiga nas que aparecía mencionado. Iso é o que diferencia o meu libro, que se centra na vida de Prisciliano dende o seu nacemento ata máis alá da súa morte, xa que se segue falando del tres século despois de que falecese. Para facelo baseeime en fontes escritas, topinimia e outros datos que puiden obter a partir das miñas investigacións, que comecei no 2002. Tento ofrecer sempre unha mirada obxectiva, sempre de acordo coas fontes, porque a miña idea é que cada lector cree unha idea propia sobre quen foi Prisciliano. Eu non lle poño máis epítetos ca o de “disidente”, porque non hai dúbida de que o foi. A partir de aí cada quen pode decidir quen cre que foi este home.

A influencia do priscilianismo en Galicia perdura ata hoxe?

É unha boa pregunta, mais complicada. É difícil sabelo porque xa existiron moitas interpretacións da mensaxe de Prisciliano na súa época. Si que se pode dicir que as doutrinas de Prisciliano perduraron en determinados núcleos poboacionais e puideron mesturarse con crenzas posteriores. Pódense ver trazas do que el representou en correntes que van en contra do cristianismo máis dogmático e ortodoxo e que pretenden volver a unha relixión menos xerarquizada e menos dependente do poder e o diñeiro. Con todo, é moi difícil precisar a súa influencia real.

Como naceu o seu interese por este tema?

O meu interese nace cando estaba a estudar a carreira de Historia en Santiago de Compostela. Dende moi cedo comecei a interesarme polos movementos relixiosos e o cristianismo primitivos. Cando tiven que escoller un tema para facer a tese de doutoramento, decanteime pola figura de Prisciliano. Resultábame curioso que, sendo un persoeiro tan vinculado a Gallaecia, algúns autores extranxeiros consideran que non podía ser galego. Defenden que unha persoa culta, rica e cunha educación plenamente romana non podía ter nado nunha área supostamente pouco romanizada e na que non había moito máis ca castros. Por contradicións coma esa decidín indagar máis neste asunto e co tempo xurdiu en min a idea de encher ese baleiro e ver quen era Prisciliano. Parecía moi complexo pero, finalmente, cos datos que se teñen si que foi posible configurar unha biografía.

DEIXAR UN COMENTARIO

Please enter your comment!
Please enter your name here