InicioCulturaCine, teatro, festas infantís e conciencia social na programación do Nadal
Cine, teatro, festas infantís e conciencia social na programación do Nadal
No Concello de Sober presentarase esta tarde a curta, Hector4, realizada polos rapaces do concello; e mañá celebran baile infantil. Mentres, en Bóveda a cita será co teatro e Albores Saúde Mental leva, un ano máis, a árbore de Nadal á casa consistorial de Monforte.
O Centro Sociocultural de Sober acolle este venres, 27 de decembro, a partir das 19.00 h., a presentación da curtametraxe feita polos rapaces e rapazas do Concello no taller audiovisual “Un Universo de Cine no teu Concello”.
A ducia de rapaces participantes no taller tiveron a posibilidade de realizar todas as tarefas de produción dunha curtametraxe, desde a idea orixinal e o guión, pasando polas localizacións, a grabación e a montaxe. Ademais de facer eles mesmos de actores e actrices. O resultado do traballo é a curta de 7 minutos, Héctor4
E o Concello de Sober celebra mañá unha Festa Infantil de Nadal para todos os que queiran achegarse. Haberá inchables, música, obradoiros e talleres de actividades para que os nenos e nenas gocen dunha tarde de lecer mentres esperan a chegada dos Reis Magos. ‘Soberlandia’ permanecerá aberto mañá sábado, de doce a dúas e de catro a oito da tarde, no pavillón do CEIP Virxe do Carme de Sober. A entrada é de balde.
En Bóveda a cita de mañá é co teatro, Lucecús Teatro estrea o espectáculo infantil ‘Os libros contraatacan’. A cita será no Centro Sociocultural ás 17:30 horas.
Un ano máis quixemos levar a nosa árbore de Nadal ao Concello de Monforte de Lemos para compartir coa veciñanza os nosos mellores desexos.
dav
E a asociación monfortina, Albores Saúde Mental, colabora, un ano máis, na celebración do Nadal na cidade do Cabe coa árbore de Nadal do Concello. A árbore que se pode ver á entrada da casa consistorial recolle este ano a seguinte mensaxe: “O Nadal vívese en compaña, cántase en conxunto e celébrase en comunidade. Brindemos pola inclusión. Bo Nadal e feliz 2020!”.
Con isto, Albores quere lembrar que nestes días de marcado tinte familiar, moita xente está soa. “É algo habitual no colectivo co que traballamos nós, máis non é o único, polo que queremos lembrarnos tamén dos demáis: as persoas maiores, as inmigrantes e refuxiadas, as persoas sen fogar… Vai o noso desexo para elas e para construir entre todas e todos unha sociedade que se responsabilice de todos os seus membros e que non os ille nin nesta época do ano nin en calquera outra”.
