Experimentos científicos na Biblioteca do Saviñao

A actividade celebrouse no colexio este venres, 2 de outubro, e estaba enmarcada dentro do programa Ler Conta Moito.

Un momento da actividade. Foto: BPM O Saviñao

Experimentos científico-artísticos, baixo este título desenvolveuse na Biblioteca Pública Municipal do Saviñao a terceira das actividades que se presentou cunha serie de experimentos científicos sinxelos para o alumnado de 5º e 6º de Infantil do CEIP de Escairón.

Tratouse de cadansúa sesión sobre ciencia nas que o alumnado descubriu, da man de Fátima de Fatiropina, diversos conceptos científicos: a tensión superficial da auga e como rompela, a función do xabón e a auga na limpeza das mans para protexerse do coronavirus, a importancia da limpeza dos dentes sobre todo agora que usamos durante tanto tempo ao día as máscaras, como se crean novas cores a partir das cores primarias, que son os fractais e como podemos crealos.

Experimentos para os máis pequenos. Foto: BPM O Saviñao

Ao remate de cada sesión, aproveitando a diferenza de densidades entre o aceite e a auga e usando cores ao óleo flotando na auga, cada participante colocou unha tira de cartolina para crear un precioso marcapáxinas totalmente orixinal.

DEIXAR UN COMENTARIO

Please enter your comment!
Please enter your name here