Estrea da curta “A rosa incandescente” o 26 de febreiro en Chantada

A rosa incandescente foi concebido como un guión cinematográfico por Anxos García Fonte. Ao longo do ano 2021, malia todas as restricións da pandemia, logrouse levar a cabo reunindo un equipo de profesionais que se entusiasmou co proxecto.

Rodaxe "A rosa incandescente" / AGF

O próximo sábado, 26 de febreiro, ás 8 do serán presentarase no Auditorio Municipal de Chantada a curtametraxe “A rosa incandescente”. Tal e como explica a guionista, o filme achega unha Rosalía de Castro cercana e directa que nos conta ela mesma algúns dos aspectos fundamentais da súa obra: a paixón pola literatura oral, o compromiso co seu país, a sensibilidade cos marxinados da sociedade, a análise económica e social do seu tempo e, por suposto, as dificultades que tivo que enfrontar por ser muller e escritora. Rosalía é a mesma rosa incandescente de intelixencia, sensibilidade e paixón polo que fai.

A rodaxe da maior parte das imaxes do filme tivo lugar nos últimos días do mes de xullo no Pazo de Sabadelle e contorna. O traballo do director, David Vázquez en coordinación co director de fotografía Bruno Máez, crea unha atmósfera máxica que leva ao mundo de Rosalía de Castro, interpretada cunha intensidade incrible por Alba López. O coidado deseño de vestiario de Ana Gesto e a sobria escolla de atrezzo de Alicia Fernández no entorno do Pazo de Sabadelle fan o resto.

O acompañamento musical, que aseguran que non deixará indiferente, corre por conta de Tamara Lorenzo. Patrocina a curta o Concello de Chantada e colaboran a Fundación Rosalía de Castro e Pinancho Audiovisuais.

DEIXAR UN COMENTARIO

Please enter your comment!
Please enter your name here