Nace ‘O Son da Aldea’, un festival cultural en Toldaos

Será os días 24 e 25 de xuño e está organizado pola Asociación de Veciños As Candelas de San Xoán de Toldaos, no Concello de Pantón. Coñecemos o programa de actividades.

Cadela Asasina. Foto cedida.

Segundo nos conta Javier Goyanes, dinamizador rural declarado, todo empezou cando decidiu ir vivir á aldea da súa nai, Toldaos, lugar no que está poñendo moita enerxía e ilusión limpando camiños, recuperando patrimonio, etc. Despois de sete anos pensou, xuntamente coa veciñanza, que era a hora de organizar un evento, e así nace ‘O Son da Aldea’, I Festival Cultural de Toldaos.

Os días 24 e 25 de xuño realizarán diferentes actividades para dar a coñecer Toldaos e contorna e xuntar xente que queira pasalo ben.

O venres 24 organizan un roteiro guiado por Toldaos para gozar da natureza e do patrimonio que alberga o lugar. A saída será ás 10:00 h. da Igrexa de San Xoán de Toldaos, cómpre reservar no teléfono 629 990 752 e o custe é de 2 € por persoa.

O sábado 25 de xuño, día grande da celebración, pola tarde haberá un recital poético no lugar das Pedras das Mouras, ás 17:30 h. e ás 19:30 h. un espectáculo de monicreques sobre a vida de Rosalía de Castro no Campo do Adrio de San Xoán de Toldaos. A montaxe leva por título “A viaxe de Rosalía” e está subvencionada pola Área de Cultura da Vicepresidencia da Deputación De Lugo. Actividade apta para todos os públicos.

Chegada a noitiña, festa rachada a partir das 21:00 h. coas actuacións do grupo tradicional “Cadela Asasina” e “Xerezade” –23:30 h.–  Tamén no Campo do Adrio e con cantina para comer e tomar algo.

Dende Asociación de Veciños As Candelas de San Xoán de Toldaos advirten que haberá outras sorpresas…

DEIXAR UN COMENTARIO

Please enter your comment!
Please enter your name here