Dous ‘barcos dragón’ navegaron polo Cabe

O club de piragüismo Quixós cambiou a xornada de adestramento deste domingo por unha xornada de lecer a bordo destas embarcacións, nunca vistas no río monfortino.

Dous 'barcos dragón' no Cabe. Foto: Marga M.

Na xornada matinal deste domingo, 12 de setembro, dúas embarcacións exóticas cunha vintena de tripulantes cada unha, foron a atracción no río Cabe de Monforte.

Tratábase de dous ‘barcos Dragón’, unha especialidade de deporte de orixe chinés con máis de 2000 anos de antigüidade. Aínda sendo orixinaria de Asia, este tipo de embarcación está xa estendida por outros continentes, incluído Europa.

Un dos barcos dragón. Foto: Marga M.

Os barcos que empregou o Quixós acolleron uns 20 tripulantes armados de pás e levaban unha cabeza de dragón na proa e un rabo do mesmo animal na popa. Ademais, na parte dianteira ía sentado un tripulante cun tambor e na parte traseira un dos deportistas do Quixós encargábase do timón.

Todo un espectáculo para a xente que paseaba pola beira do Cabe nesta xornada matinal de domingo e unha experiencia diferente de adestramento, lecer e convivencia para os e as deportistas do club monfortino.

Estes barcos Dragón foron cedidos pola Xunta de Galicia para o seu uso durante uns días e terán que ser devoltos para que outros clubs poidan gozar da mesma experiencia.

DEIXAR UN COMENTARIO

Please enter your comment!
Please enter your name here