Hoxe día 25 de xuño presentouse en Monforte a nova iniciativa empresarial do Polígono Industrial de Reboredo. Trátase dunha empresa de nova creación denominada “Gallaecia Delicatessen” iniciativa do empresario Jesús Hernández Bleda, de orixe catalá pero afincado en Bóveda.
“Gallaecia Delicatessen” dedícase á transformación e comercialización de produtos cárnicos de gando vacún autóctono selecto. En palabras de Jesús Hernandez, trátase de “ganado autóctono gallego, piezas nobles, piezas extras, piezas de primera y elaborados”. O seu produto estrela son os lomos madurados de vaca e boi, para os que utilizan un moderno sistema de maduración. Estes alimentos distribúense en toda España, pero tamén noutros países da Unión Europea como Francia, Alemaña, Bélxica ou Suíza.
Este proxecto contará cun investimento de dous millóns de euros, dos cales 480.000 proveñen dunha subvención da Consellería do Medio Rural. Espérase que cree uns 25 postos de traballo directos, ademais das seis persoas que xa traballan nel. Ocupará un total de 1800 metros cadrados de instalacións no parque empresarial de Reboredo, distribuídos nun peirao de carga e descarga, unha zona de lavado, tres cámaras de maduración e oficinas, entre outros.
