Os números de creación de emprego no mes de xullo, mes central do verán no que o turismo tira dos contratos de tempada, non son os que se espera desta época do ano. O aumento de contratación foi moi moderado cun descenso global de 70 parados/as nas catro comarcas que cubre este xornal.
Por comarcas, Lemos é a mellor situada descendendo o paro en 26 persoas. O concello deste territorio onde máis aumentou a contratación foi O Saviñao con 25 persoas, sendo A Pobra do Brollón o municipio que aporta peores datos con 9 parados máis.
No resto de comarcas, Quiroga sumou 25 cotizantes máis, Sarria baixa o paro en 16 persoas e Chantada tan só en 3. O total de parados nestas catro comarcas ascende actualmente a 3.299 desempregados/as.
Datos por concellos
Concellos onde baixou o paro: O Saviñao (-25), Quiroga (-20), Monforte (-10), Sarria (-8), Sober (-7), Folgoso do Courel (-4), Carballedo (-4), O Incio (-4), O Páramo (-4), Chantada (-1), Ribas de Sil (-1), Paradela (-1) e Samos (-1).
Concellos onde subiu o paro: A Pobra do Brollón (+9), Bóveda (+4), Pantón (+3), Triacastela (+3) e Taboada (+2).
O Concello de Láncara mantense, nin suma parados nin crea emprego.
Descontento dende o sindicato CC. OO.
Dende Comisión Obreiras láianse da moderada creacion de emprego de xullo e de que nun concello como Monforte de Lemos o número de parados ascenda a 1.032, o 69,9 % do paro do total da comarca. A secretaría de acción sindical afirma que con estes datos “vemos un sector servizos que xa non dá máis de si” e critica as manifestacións do alcalde José Tomé onde afirmaba que na semana das festas os comerciantes e hoteleiros “fan o agosto”.
En relación a estas declaracións, dende o sindicato pensan que “hai que potenciar o sector industrial xa que o sector servizos non dá para máis” indicando ademais que “todos vemos como se xubilan moitos comerciantes e cada vez hai máis baixos comerciais pechados”.
