Sober aproba 2,8 millóns de orzamento

O Concello de Sober vén de aprobar, cos votos a favor do Grupo de Goberno e a abstención de Agroma Sober e o PSOE, uns Orzamentos para 2020 nos que prima o gasto social e o investimento público. O orzamento ascende a 2.805.000 euros

Concello de Sober. Foto cedida.

No capítulo de ingresos, o concello de Sober baixa a taxa do lixo nun 10%, ao tempo que non se sobe ningún imposto nin taxa municipal (gardería, IBI, vehículos, escola de música, auga e saneamento).

No apartado de gastos, o Concello prima o gasto social ao que destina preto de 800.000 euros. Contémplase un importante incremento no salario para as Auxiliares de Axuda no Fogar, arredor dun 6% (por uso de vehículo propio), máis o 2% que corresponde coa suba estatal, e contémplase un 0,3% adicional. Mantense o Servizo de Conciliación no CEIP Plurilingüe Virxe do Carme, gratuíto con xornada de mañá e tarde.

Amplíase a dotación das becas de transporte universitario e as axudas para alumnos de BAC. Amplíase a dotación das axudas aos clubs de Fútbol e seguirá habendo axudas para deportistas individuais.

O concello segue a rebaixar a débeda viva co obxectivo de rematar o ano con débeda cero. O Concello de Sober fará ademais un importante esforzo na mellora da rede de saneamento e abastecemento (ao que destina 430.000 euros), nas infraestruturas viarias (250.000 euros) e no impulso do turismo (máis de 200.000 euros), a través de medidas concretas que irá dando a coñecer nas vindeiras semanas.

DEIXAR UN COMENTARIO

Please enter your comment!
Please enter your name here