A colaboración entre o BNG e o goberno municipal permite que os clientes cambien o seu diñeiro por vales de compra bonificados – cun valor superior á cantidade enregada- para gastar nas tendas e negocios da vila. “Por cada trinta euros que cambien, recibirán un vale de corenta euros”, exemplificou Efrén Castro, que convidou aos comerciantes a seguir facendo achegas para acabar de definir a campaña. “Cun investimento de 35.000 euros, mobilizaremos uns 140.000 euros, que irán parar directamente ás tendas e comercios da vila”, calculou o voceiro nacionalista.
Castro explicou que “a campaña toma como referencia iniciativas que se teñen levado a cabo con gran éxito en concellos con gobernos nacionalistas como Ribadeo ou Carballo”, e agradeceu a “boa disposición do goberno local para levala a cabo”.
Segundo comentou, “a iniciativa foi recibida con ilusión por parte do sector que agradece calquera proposta dirixida á dinamización do comercio local, mais nun momento de dificultades coma o provocado pola crise sanitaria”. Durante o encontro, os comerciantes comprometéronse tamén a facer as súas achegas de cara á concreción da campaña que, estima o BNG, se porá en marcha despois do verán.
Efrén Castro encadrou a iniciativa no proxecto da formación nacionalista que aposta “na defensa do comercio local e de proximidade para dinamizar as economías locais”. O voceiro nacionalista adiantou que “o grupo municipal seguirá traballando en acordos e propostas en positivo que melloren a calidade de vida da veciñanza.