Axudas para o fomento da iniciativa empresarial en Monforte

O concello concede, por segundo ano consecutivo, axudas ás empresas que xeren novos postos de traballo. O prazo para presentar as solicitudes remata o 30 de novembro.

Monforte / Concello de Monforte

Poden acollerse a estas axudas, os empresarios e as pequenas e medianas empresas (PEME) que comezaran a súa actividade entre o 1 de novembro de 2017 e o 31 de outubro de 2018, despois de estar en situación de desemprego. A finalidade é subvencionar parte dos gastos da posta en marcha e do funcionamento da empresa (constitución, existencias iniciais de mercadorías, gastos de alugueiro do local, primas de seguros, subministracións e gastos correntes) durante os primeiros meses da actividade.

A contía destas subvencións ascende a 25.000 euros, e o importe máximo de cada axuda será de 1.500 euros. Esta cantidade poderá incrementarse nun 25% no caso de que o beneficiario sexa muller ou unha persoa con discapacidade. Os autónomos poderán ser beneficiarios das axudas cando formen parte dunha Comunidade de Bens, Sociedades Civís ou constitúan unha Sociedade Mercantil.  Os detalles das bases poden consultarse na páxina web do Concello.

O obxectivo do concello é, segundo o alcade José Tomé, colaborar de forma activa na xeración de emprego e apoiar a posta en marcha de novos proxectos empresariais. Estas axudas tamén serven para fixar poboación e contribúen a un desenvolvemento sostible, facilitando a empregabilidade. Segundo o rexedor local “estas axudas, sumadas á posta en marcha do novo Obradoiro de Emprego, son elementos que demostran a aposta do Equipo de Goberno para contribuír a asentar postos de traballo no municipio”.

DEIXAR UN COMENTARIO

Please enter your comment!
Please enter your name here