Este conxunto pictórico de gran valor histórico e artístico permanecía na súa maior parte oculto cuberto pola cal. Os traballos realizaranse nos muros norte e sur da nave e o arco triunfal que os une. Hai áreas nas que se fixeron catas polas que asoman os elementos iconográficos ademais de zonas desencaladas que tamén precisan dunha restauración. O estilo das iconografías sitúase como obra de principios do século XVI, á maneira hispano-famenca.

Neste sentido, entre os danos principais que é necesario reparar figuran o encalado de toda a superficie e os desencalados parciais que produciron perda de policromía; isto sucede sobre todo nas catro escenas localizadas baixo o coro. Aprécianse grandes oquedades entre o morteiro e o muro en todo o paramento -en especial no enlucido na zona inferior do coro- así como colonizacións biolóxicas e manchas de escorrentas.

O pasado ano, a Consellería investiu 154.000 euros na primeira fase de obras nesta igrexa, consistente en reparar danos na cuberta, os paramentos e outros elementos estruturais, actuación imprescindible para poder acometer agora a recuperación das pinturas.

O contrato que agora se licita inclúe a redacción do proxecto de intervención para restaurar as pinturas, a execución material dos traballos e a realización de informes de seguimento e de resultado. O prazo de execución será de nove meses dende a sinatura do contrato, e as empresas interesadas en concorrer á licitación teñen de prazo ata o día 12 de xuño para presentar as súas ofertas.

A igrexa parroquial de San Vicente de Pinol está protexida polo seu valor cultural ao estar incluída no Catálogo do patrimonio cultural de Galicia. É de estilo románico de comezos do século XIII, estruturada mediante unha planta de cruz latina e ábsida rectangular cuberta por unha bóveda de canón, e cunha cuberta de madeira a dúas augas sobre a nave. Hai dous engadidos posteriores á estrutura inicial da igrexa: a sancristía situada no lateral norte da ábsida e outro habitáculo no sur da ábsida.