O Courel, escenario dun seminario de conservación do oso pardo

"A conservación de grandes carnívoros en áreas de expansión: O caso do oso pardo na Serra do Courel" é o título dunhas xornadas que se desenvolverán entre os días 4 e 6 de setembro.

Oso Pardo nos Ancares | Fonte: turgalicia

A Universidade de Santiago de Compostela (USC), en colaboración coa Fundación Oso Pardo, organizaron un seminario sobre a conservación do oso pardo. Terá lugar entre os días 4 e 6 de setembro na Estación Científica do Courel, e nel analizaranse os retos aos que se enfronta esta especie no territorio da serra, así como o papel das administracións e o efectos que produce a súa presenza no rural.

O seminario, que ten unha estrutura práctica e divulgativa, leva por título “A conservación de grandes carnívoros en áreas de expansión: O caso do oso pardo na Serra do Courel” e foi organizado no marco do programa europeo Life Oso Courel e conta co apoio económico da Deputación de Lugo.

Estas xornadas están dirixidas aos habitantes das serras orientais de Lugo e Ourense, así como a profesores e estudantes de diversos niveis educativos, segundo indicaron dende a organización. Doutra banda, tamén se pretende que formen parte del “todos os profesionais implicados en tarefas de conservación da natureza“.

DEIXAR UN COMENTARIO

Please enter your comment!
Please enter your name here