Demándase debate social nas propostas de Reserva da Biosfera da Ribeira Sacra e serras de Iribio e Courel

As candidaturas de Por un interior galego vivo solicitarán á Xunta, reunións en cada Concello integrado na candidatura Reserva da Biosfera, das que participen grupos municipais, asociacións e axentes sociais e económicos.

Folgoso do Courel / XdL

A zona delimitada como proposta de Reserva da Biosfera engloba os concellos que integran o Xeoparque Montañas do Courel, máis os Concellos de Triacastela e Samos (Iribio) e O Incio, así como os incluídos no BIC Ribeira Sacra máis Sarria, aínda que non se inclúe a zona do Bibei ou o Val do Navea, nin Montederramo.

O núcleo da reserva serían as Zonas de Especial Conservación xa existentes, así como o Espazo Natural de Interese Local Loio-Ruxidoira, Os Ancares-Courel, Río Cabe, Canón do Sil, Monte Faro

As Reservas da Biosfera pretenden “conciliar e consolidar a conservación da natureza e o desenvolvemento económico e social”, algo que segundo Por un interior galego vivo,  “malamente se pode acadar sen a implicación da poboación local e se se continúa o desleixo das Administracións cos servizos públicos e sectores produtivos do territorio, especialmente no que ten que ver co sector agrogandeiro ou co ferrocarril”.

Consideran que a candidatura non desenvolve os retos socioeconómicos e demográficos aos que se enfronta a cidadanía destas comarcas e cren que se ofrece unha visión optimista do desenvolvemento acadado, esquecéndose do despoboamento e o avellentamento da poboación. Sinalan que a candidaturatampouco afonda nos retos medioambientais aos que se enfronta o territorio como “a contaminación dos ríos Pesqueiras e Enviande, as toneladas de lixo verquidas ao Sil en pleno canón ou os parques eólicos en Paradela e serra do Iribio ou a contaminación e falta de capacidade depuradora para o río Cabe.”

Por un interior galego vivo entende que para traballar e mellorar un territorio tan extenso é necesario un coñecemento real da situación por parte da Xunta e cre que a inversión destinada ao plan de xestión, 450.000 euros anuais, non é suficiente e que son necesarias políticas reais de conservación da natureza.

A Reserva da Biosfera prevé un Foro de Participación que entenden será bastante limitado. Por todo o anterior, as asembleas locais das distintas candidaturas de POR UN INTERIOR GALEGO VIVO traballarán en achegas ao documento presentado pola Xunta, que incluirán a proposta de erradicar os eucaliptos na zona, deter parques eólicos en Rede Natura ou apostar polo Parque Natural no Courel, así como aumentar a contía anual para o Plan de Xestión.

Candidaturas Por un interior galgo vivo / Por un interior galego vivo

DEIXAR UN COMENTARIO

Please enter your comment!
Please enter your name here