En marcha o IV campo de voluntariado do Castro de San Lourenzo

O equipo de arqueólogos que está a escavar o Castro de San Lourenzo en Cereixa xa conta con reforzos de 11 voluntarios, procedentes de diferentes puntos de Galicia, Andalucía e País Vasco. É o cuarto campo de voluntariado que ten lugar no castro, financiado pola Xunta de Galicia en colaboración co Concello da Pobra do Brollón.

campo de traballo Castro de San Lourenzo / concello A Pobra do Brollón

O campo prodúcese no marco do Proxecto San Lourenzo de arqueoloxía en comunidade. O grupo de voluntarios apoiarán a sétima campaña de escavacións que se desenvolve no castro, e que están en marcha dende a semana pasada dirixidos por Xurxo Ayán.

Este ano o obxectivo é ampliar a zona de escavación que se estende entre a ábsida da ermida e a muralla do castro, para procurar o límite da necrópole altomedieval e ver como conectan os restos medievais coa muralla antiga do castro. Ademais das tarefas no Castro de San Lourenzo, os voluntarios dedicarán o seu tempo libre a coñecer outros elementos patrimoniais de Cereixa e do municipio da Pobra do Brollón. As escavacións no castro están abertas ao público.

O programa de visitas guiadas ‘Déixate Guiar’ que ofrece o Concello da Pobra do Brollón permite coñecer o Castro de San Lourenzo e ver as escavacións en primeira persoa. As visitas ofrécense de mércores a domingo ás 11:00, aínda que para ver os traballos arqueolóxicos en directo hai que asistir un día entre semana. As visitas guiadas son gratuítas, previa reserva no teléfono 674 939 673 (preferiblemente por WhatsApp).

DEIXAR UN COMENTARIO

Please enter your comment!
Please enter your name here