O PP de Monforte felicítase polas xestións con Turespaña para restaurar a muralla

Segundo o PP, a xestión é froito da proposición non de lei dos populares, aprobada no Parlamento, para solicitar do Ministerio de Enerxía e Turismo e de Turespaña, a recuperación e restauración do tramo da muralla entre a Torre da Homenaxe e a Porta Nova.

Porta Nova muralla / Josercid

A muralla de Monforte é un dos conxuntos fortificados da Idade Media máis importantes de Galicia e constitúe un importante valor cultural para Monforte pero “sofre un abandono alarmante. Isto a pesar de que o Concello dispón dende o 2008 dun Plan de actuacións para a súa recuperación; pero dende aquela xa se perderon máis de 10 anos sen facer ningunha xestión ao respecto”, critican os populares.

Lamentan tamén que o alcalde non pedise, nestes anos, as axudas do 1% cultural, que permitirían actuar sobre os tramos da muralla de titularidade municipal. “Ante a inacción do goberno local, tivemos que traballar para coñecer a titularidade, e unha vez constatado que parte da muralla era de Turespaña, instar a que actuasen a través do Parlamento de Galicia”, sinalan desde o PP.

A voceira do Grupo Municipal Popular, Julia Rodríguez, cre que “o inicio do estudo da situación actual do monumento por parte dos técnicos de Turespaña de cara á mellora do estado de conservación da muralla é unha boa nova para Monforte”. Rodríguez lamenta que “o equipo de goberno local teña votado en contra das iniciativas a este respecto que se debateron no Pleno a iniciativa do Grupo Popular incluso cando se lle pedía que mantivese a muralla en axeitadas condicións de limpeza”.

DEIXAR UN COMENTARIO

Please enter your comment!
Please enter your name here