Enfermeiras en Loita denuncia a precariedade do seu sector cunha enquisa

Este colectivo sinala que unha maior precariedade laboral neste sector vai da man dun deterioro da calidade asistencial.

Hospital de Monforte. Foto cedida.

O colectivo Enfermeiras en loita deu a coñecer onte día 17 de xuño os resultados da “Enquisa da Enfermaría galega precaria“. Trátase dun informe que recolle as conclusións principais da enquisa realizada entre os meses de marzo e maio a máis de 700 profesionais temporais da enfermaría en Galicia.

A súa principal conclusión é que a inestabilidade laboral neste sector non é un feito puntual, senón que vai en aumento cun conseguinte deterioro da calidade da asistencia. Segundo declaran os responsables do colectivo, os traballadores temporais da sanidade non teñen vacacións nin posibilidade de baixas por enfermidade ou embarazo; e están sometidos a mobilidade entre servizos de forma case diaria, coas dificultades que isto conleva para levar a cabo unha conciliación familiar e social axeitada.

O rostro da precariedade é feminino: case o 90% das persoas enquisadas son mulleres, cunha media de idade de 32,2 anos. Máis do 89% deles opina que se atopa nunha situación de precariedade, xa que de media levan uns 8 anos nas listas. Dende a asociación Enfermeiras en loita consideran que “é tempo de coidar a quen te coida” e poñerlle fin á temporalidade entre os traballadores da sanidade.

DEIXAR UN COMENTARIO

Please enter your comment!
Please enter your name here