Nace unha plataforma en defensa do CEIP Frei Luís de Granada

Este movemento social xermolou o pasado 6 de febreiro despois dunha asemblea conformada pola comunidade educativa e a veciñanza sarriá. O obxectivo da mesma é ser un elemento máis de presión para conseguir un colexio público digno.

CEIP Frei Luís de Granada, en Sarria | Páxinas Galegas

O xoves 6 de febreiro a comunidade educativa e a veciñanza de Sarria reuníronse en asemblea no salón de plenos do Concello de Sarria para tratar o futuro do CEIP Frei Luís de Granada.

Os temas que se abordaron e debateron estiveron relacionados directamente coa “pésima xestión e trato que a Xunta de Galicia tivo respecto da situación da infraestrutura do colexio”, segundo palabras textuais que fixeron chegar nun comunicado de prensa. Entenden que os dirixentes desta institución incorreron en mentiras e en incumprimentos, e o que é máis grave “exercendo presión sobre o profesorado, non mirando pola seguridade das crianzas”, engaden.

…os dirixentes desta institución incorreron en mentiras e en incumprimentos

Amosan o seu malestar tamén coa solución provisional de trasladar aos estudantes á Escola Fogar, edificio que non reúne as condicións mínimas para o desenvolvemento óptimo do traballo lectivo nas aulas. Segundo nos conta unha integrante da Plataforma, “a Escola Fogar non cumpre cos parámetros de habitabilidade, a calefacción non está preparada para volver a funcionar… trasladarse aquí é unha solución mala, pero polo menos segura”. Nótase a incomodidade da solución provisional pero deixa caer, con resignación, que polo menos neste realoxamento non hai risco de que o edificio se veña abaixo.

Por todo o anterior, os e as activistas alcanzaron o acordo de crear a “Plataforma en defensa do CEIP Frei Luís de Granada”, colectivo que buscará mellorar a situación actual, canalizar as demandas de pais, nais, profesorado e sociedade en xeral, co obxectivo de conseguir un colexio público digno, un colexio do século XXI. Láianse que dende o 2011 a consellería non aborda o problema como debera, recorrendo a parches construtivos.

Unha  integrante da Plataforma coméntanos que esta construción xa naceu presuntamente con vicios, como deficiencias na cimentación, unha mala execución con materiais de baixa calidade -de finais dos anos 60- e aínda por enriba unhas malas reparacións ao cambiar a cuberta anos atrás sen reforzar a estrutura, estrutura con deformacións no forxado. Todo isto dedúcese de informes sobre a construción que se coñecen e que non casan cos que traballa a consellería. Neste senso, a plataforma solicitará todos os informes técnicos do edificio dende a súa construción, o proxecto de execución e toda a información que se poda para estudar o edificio para falar con coñecemento de causa e buscar cal é a mellor solución.

A idea que defende o colectivo en defensa do colexio sería un estudo exhaustivo para saber que facer, igual si se pode restaurar e acometer unha reforma integral pero ao mellor non procede e non é viable. E mentres, segundo nos comentan, a Consellería de Educación está arranxando os voladizos e igual acomete unha reforma integral da estrutura, cuestión que a día de hoxe non se comunicou oficialmente.

Este movemento social que xorde en forma de plataforma pretende ser unha forza máis de presión, recoñecen que o Concello de Sarria e partidos políticos están involucrados e demandan solucións pero cantos máis sexan mellor. No comunicado de prensa do pasado 7 de febreiro convidaban a unirse á plataforma a ANPAS, asociacións culturais e deportivas, partidos políticos, sindicatos e demais interesados/as que queiran apoiar a causa en beneficio da vila de Sarria. Neste senso lembran que o funcionamento será transparente e democrático, que todas as persoas que o desexen poden participar e votar nas asembleas sendo as decisións adoptadas públicas.

A nosa activista informante coméntanos que aínda que acaban de nacer xa hai colectivos e xente que queren formar parte, e dinos tamén que teñen traballo por diante, farán máis mobilizacións, reunión informativas, falarán cos partidos políticos e pedirán informes técnicos para coñecer de forma real e obxectiva o estado do CEIP Frei Luís de Granada.

pedirán informes técnicos para coñecer de forma real e obxectiva o estado do CEIP Frei Luís de Granada

A mellor solución pasaría pola construción dun colexio novo porque quizais novos ‘parches’ non arranxan o problema, e así o pensan tamén na Plataforma. E como polo de agora non se contempla esta opción, a nosa informante deixa caer que “non debe interesar, nos presupostos que teñen non debe entrar construír un cole novo…”.

DEIXAR UN COMENTARIO

Please enter your comment!
Please enter your name here