A asociación Segredos de Pantón amósanos nesta entrega do mes de setembro unha entrevista con Elena, unha das impulsoras e presidenta da Asociación de Veciños de Moreda. Este colectivo naceu de xeito espontáneo, no ano 2019, despois das boas sensacións e a participación activa da veciñanza tras unha recollida de fotos antigas para organizar unha exposición.

Aquí a entrevista que lle fixeron:

Para comezar, Elena, como é iso de ser a presidenta da asociación de veciños? Que tal o levas, acostúmaste?

Pois o de ser presidenta foi algo circunstancial, por como xurdiu a asociación. Creo que é un papel que tes que desempeñar con moita responsabilidade. O meu obxectivo principal é acadar a unión de tódolos veciños e veciñas. Pero teño que recoñecer o labor de todos os que formamos parte da asociación, sobre todo das miñas veciñas, que son as que colaboran para que tódalas actividades saian adiante.

“O meu obxectivo principal é acadar a unión de tódolos veciños e veciñas”

Por que decidistes fundar en Moreda unha asociación de veciños? Cal era a vosa intención?

A idea da asociación xurdiu de forma espontánea e creo que foi algo moi bonito. Eu sempre me defino como unha herdeira de historias, porque dende moi pequena levo escoitando miles de historias dos meus veciños e veciñas, de cousas que pasaron na parroquia, de veciños e veciñas que xa non están, de como era a vida antes… Por outra parte, tamén me gusta moito a fotografía antiga e sentía a necesidade de poñerlle cara a todos eses protagonistas das historias que levaba escoitando tantos anos. Entón, ocorréuseme facer una recollida de fotos antigas e creei un grupo de Whatsapp. E a resposta dos veciños e veciñas foi moi positiva, achegaron un montón de fotografías. A partir de aí fixemos unha primeira reunión, que naquel momento era co obxectivo de levar a cabo unha exposición de fotos, pero da que xurdiu a idea da asociación. E foi así como a puxemos en marcha a finais do 2019.

“Tamén me gusta moito a fotografía antiga e sentía a necesidade de poñerlle cara a todos eses protagonistas das historias que levaba escoitando tantos anos”

Tentades alonxarvos da idea de que a asociación só existe para as festas da parroquia e un par de eventos máis no ano e realmente organizar cousas ao longo do ano?

Si, esa é a idea. Dinamizar un pouco a parroquia, ter máis contacto entre os veciños. Intentar recuperar o patrimonio natural e cultural da parroquia, algunhas tradicións… De momento a festa da parroquia aínda non a chegamos a recuperar (risas), pero todo se andará. Creo que con ilusión pódense chegar a facer moitas cousas.

Ao serdes vós a voz directa do pobo, que temas vedes que preocupan máis sobre a parroquia aos habitantes?

Pois creo que os temas que máis preocupan aos veciños e veciñas son os servizos básicos. Ter estradas en boas condicións, ter os camiños limpos, que todos os servizos como auga, saneamento, acceso a internet cheguen a tódalas parroquias.

“Os temas que máis preocupan aos veciños e veciñas son os servizos básicos”

Ata o día de hoxe tedes organizado de novo as comadres e compadres e organizastes xunto a nós unha ruta. Como vedes e como o ven os veciños toda a vosa actividade?

Dende que naceu a asociación fixemos unha cea-xuntanza, recuperamos a tradición dos compadres e comadres que levaba máis de cincuenta anos sen celebrarse na parroquia (aínda que no 2020 non a puidemos levar a cabo pola pandemia), organizamos xunto con Segredos de Pantón unha ruta por toda a parroquia e este ano participamos tamén no programa Musiqueando da Deputación de Lugo e organizamos un concerto de música tradicional. Creo que aos veciños e veciñas gústalles que se fagan actividades na parroquia. É unha maneira de xuntarse, de pasar un rato divertido e a verdade é que sempre agradecen que se leven a cabo actividades.