Diario de Corentena do 16 de abril do 2020:
Cando comezabamos o confinamento sabiamos que nos enfrontabamos a unha situación nova na que previamos que cambiarían cousas no entorno e en nós mesmos; que nos dariamos máis conta do que é importante para nós e que levados pola inercia e a velocidade do cotiá non lle dedicamos tempo. Podía ser a oportunidade de relativizar o tempo e saber que queremos priorizar nel.
Cambian as vosas prioridades ou refórzanse as que xa tiñades? Queredes volver á vida de antes ou hai cousas daquela vida que agora queredes cambiar?, ademais do que xa cambiará por si mesma. O confinamento fainos pensar no básico, na familia, no próximo. Impórtanos máis o que pase no noso concello, que en París; no noso edificio que no Hula, ou o que lle pase á nosa irmá antes que ao sobriño da parella, así tampouco vimos chegar o Covid19. E volvín pensar no comercio de proximidade e no sector primario.
COMO UTILIZAMOS A VENTANA DE INTERNET?
Co confinamento as vendas de videoxogos aumentaron, intensificouse o teletraballo, as plataformas dixitais gañan suscriptores, as redes sociais arden, Amazon aumenta as súas vendas cada día; por poñer algún exemplo. Funciona un pouco como o Covid19, sen chegar a matar, esténdese a todos os ámbitos.
O comercio de proximidade leva tempo reclamando atención e avisando das súas principais ameazas; as grandes superficies e a venda online das grandes plataformas. En Monforte, o CCU desenvolvía no pasado mes de setembro unha campaña de sensibilización na que os comercios empapelaron os seus escaparates e pecharon as súas portas para trasladar á cidadanía unha cidade sen comercio. O xerente do CCU, natural da Mariña e confinado en Monforte, vive a situación con preocupación e lembra a filosofía daquela campaña “Quen nos ía dicir que a campaña que desenvolvemos se ía ver superada pola realidade? que o peche do comercio se ía producir e non teríamos movemento nas rúas. A Covid19 presenta unha campaña complexa e radical.”
O caso é que a Covid19 paralizou a práctica totalidade do comercio de proximidade e ao mesmo tempo puxo en auxe internet. As vendas online disparáronse co confinamento e o comerciante á outra beira do teléfono lembra a importancia de comprar no comercio local cando a situación o permita, “esta crise e o confinamento poden consolidar internet no cliente, ver que poden vivir comprando por internet e poden concluír que xa non necesitan ao comercio local. Se egoistamente o cliente acepta a situación, igual por unha decisión estética de camiñar por rúas sen comercios, o comercio acabarase. Se non somos funcionais non nos poderemos salvar e teremos que comezar a mirar internet con outros ollos e comezar a vender por internet.”
QUE SE PODE FACER COAS OPCIÓNS QUE TEMOS?
Os centros comerciais abertos, como os de Chantada, Monforte e Sarria veñen de desenvolver a campaña #MorriñaDeTi e seguen traballando na volta. En Sarria, por exemplo, están preparando unha plataforma www.acesarria.net, para que a veciñanza poida mercar produtos e servizos dos negocios da vila e consumilos cando isto acabe. Baixo o lema “Voltaremos, Querémoste con nós”, a plataforma estará operativa a partir do próximo sábado, día 18 de abril.
No sector primario, o Conselleiro do Medio Rural, anunciaba este mércores que os agricultores, gandeiros e industrias transformadoras de produtos agroalimentarios galegos poden solicitar a súa adhesión como provedores da rede “Mercaproximidade”, que pretende “concienciar da importancia de consumir produtos de proximidade, non só pola súa calidade senón tamén para recoñecer o papel fundamental do agro galego á hora de garantir o abastecemento de alimentos durante o estado de alarma.” Que se pode facer coas opcións que temos?
