O PP do Saviñao encara o fin de campaña con varios proxectos

O candidato á alcaldía, Juan Carlos Armesto, está dando a coñecer aos veciños e veciñas o seu programa electoral coa intención de revalidar a maioría absoluta no concello. O venres 24 de maio terá o mitin de fin de campaña no auditorio de Escairón.

Candidatura PP O Saviñao / PP Provincial

O candidato popular, Carlos Armesto, explica que “o noso proxecto recolle diversas actuacións en materia de infraestruturas como é o caso da construción da Casa da Xuventude, a nova residencia da terceira idade e centro de día, o novo centro médico, a reforma do pavillón municipal e a ampliación do polígono industrial; ademais da ampliación e mellora da cobertura de telefonía e Internet tendo en conta as necesidades no eido das novas tecnoloxías”.

En relación a outros proxectos para o concello a intención é mellorar as infraestruturas no rural: ampliar traídas e rede de sumidoiros, crear centros sociais nas parroquias, mellorar as vías municipais e accesos aos viñedos e tamén ordenar e impulsar o sector forestal.

En materia de emprego, os populares do  Saviñao recollen no seu programa a creación do I Plan de emprego municipal e o desenvolvemento de talleres de formación e obradoiros.

Tamén se inclúen algunhas baixadas de impostos, en relación á recollida de lixo e o servizo de vao, o reforzo dos servizos sociais e a atención polos mozos e mozas coa creación de Escolas Deportivas e a ampliación e mellora da piscina municipal. Para os máis pequenos e pequenas prometen ampliar os parques infantís e a creación dunha ludoteca con servizo de custodia. E como idea de cara a unha exaltación da viticultura no concello propoñen os populares a organización da primeira festa da vendima da Ribeira Sacra.

mitin fin de campaña

O candidato á alcaldía, Carlos Armesto, pechará a campaña electoral cun mitin que se celebrará o vindeiro venres 24 de maio a partir das 21:30 h. no auditorio de Escairón. Tamén intervirán o senador electo do Partido Popular pola provincia, José Manuel Barreiro, e o conselleiro de Economía e Industria, o monfortino Francisco Conde.

Carlos Armesto ‘O Mina’. Fonte: PP provincial

DEIXAR UN COMENTARIO

Please enter your comment!
Please enter your name here