Unha medida que dinamiza o comercio local e axuda ás familias en situación de dificultades económicas é dotalas de tarxetas para facer gasto nos negocios locais. “Trataríase de estudar as vías para facerse con tarxetas electrónicas, ou ben cupóns, que o Concello adquirise para dar á xente con dificultades económicas e que estas persoas os poidesen usar no que precisaran. Esta medida podería impulsarse dende a Deputación provincial.” sinalan desde Agroma Sober.
Tamén propoñen dar impulso aos negocios locais visibilizándoos na internet, mediante unha web ou pestana específica, así como dispor de información sobre os mesmos nos lugares de información turística, “para que as persoas visitantes ou turistas que se acheguen a Sober poidan planificar a súa xornada no propio Concello e mesmo adquirir os produtos que precisen.”
Agroma Sober quere potenciar o teletraballo habilitando un espazo co-working, con conexión á Rede para que a cidadanía de Sober poida usar cun prezo asequible por hora. A este respecto o concello anuncia que en xuño habilitará ese espazo.
Nunha moción presentada no concello, Agroma Sober pide:
- Estudar a vía para dispor de tarxetas e/ou cupóns prepagados de uso no comercio local para aquelas persoas con dificultades económicas, trasladando esta idea á Deputación Provincial de Lugo para facelo tamén a nivel provincial.
- Facer un listado cos negocios que hai no Concello para darlle visibilidade nunha web (ou ben nun apartado da web do concello) e imprimir panfletos para distribuír na Oficina de Turismo e nos aloxamentos turísticos.
- Poñer a disposición da cidadanía un espazo para co-working municipal onde se poidan desenvolver actividades (como reunións de traballo) e mesmo o teletraballo, con rede de wifi e con un pago simbólico para facilitar o uso do mesmo.
