O PP insta á Deputación a poñer en marcha o club náutico de Belesar

O portavoz popular, Javier Castiñeira, comprobou en compañía do alcalde Manuel Lorenzo Varela que as instalacións do club de Chantada seguen pechadas e destaca á importancia de que estean operativas para estimular a economía local.

Club Belesar / PP Provincial

O turismo fluvial constitúe unha magnífica oportunidade para atraer visitantes á provincia de Lugo, segundo sinalan desde o PP. Aseguran que a Deputación baixo gobernos populares, fixo un gran esforzo para crear instalacións capaces de atraer turismo, que “funcionaron ata que a desidia de gobernos provinciais dirixidos por presidentes socialistas levaron ao peche de varias destas instalacións.”

Castiñeira explica: “ Sabemos que saíu licitada a súa concesión en febreiro do ano pasado e que o concurso quedou deserto; queda demostrada así a falta absoluta de interese do goberno provincial por sacar adiante estas instalacións”.

Castiñeira expón que os populares piden á Deputación que saque de novo a licitación a explotación do club e que “faga os novos pregos de condicións de maneira que se prime a posta en servizo”. Segundo Castiñeira, “estas instalacións pechadas dan unha imaxe moi mala dunha zona  moi importante  da provincia como é a Ribeira Sacra, que é candidata a Patrimonio da Humanidade”.

Club Belesar / PP Provincial

Está seguro de que “se noutra provincia tivesen estas instalacións, dende logo, non estarían pechadas”. Destaca que para Chantada este club náutico é un recurso moi necesario. “Ten moitísimas posibilidades como os clubs que xa vimos en Portomarín e Augasmestas (Quiroga) e que siga pechado é unha mostra máis do abandono das instalacións fluviais por parte do goberno da Deputación”, conclúe Castiñeira.

DEIXAR UN COMENTARIO

Please enter your comment!
Please enter your name here