A voceira popular sinalaba despois da visita de Gonzalo Caballero a Monforte este sábado, que “os monfortinos xa valoraron nas últimas eleccións autonómicas a xestión da pandemia feita polo Goberno do PP na Xunta”. E explica que o goberno de Tomé aínda non foi capaz de sacar axudas este ano en apoio aos sectores afectados en Monforte; mentres que “a Xunta está a establecer medidas consensuadas cos sectores afectados e convocando axudas para axudar a paliar a crise”.
A popular considera que axudar á veciñanza a saír da crise é a prioridade, mentres que o alcalde “segue pensando en facer unha obra faraónica tendo remanente suficiente nas arcas municipais. Eses cartos deberían dirixirse a axudar aos nosos veciños ante esta situación excepcional”. A este respecto, o Grupo Municipal Popular vén de rexistrar unha moción para esixir ao goberno local do PSOE que estableza un plan de axudas directas e outras medidas fiscais para contribuír a paliar os efectos sobre a economía local das medidas para conter a pandemia da covid-19.
A proposta dos populares recolle a exención de tódolos impostos que repercuten nunha actividade económica na cidade polo menos durante o 2021: desde a taxa de terrazas ou a do lixo, ata o IBI e o IVTM sempre que estean ligados a unha actividade económica. Igualmente, o Grupo Municipal Popular propón que se volva emitir unha bolsa de axudas directas dirixida a aqueles negocios que tiveron que pechar as súas portas dando cumprimento á orde do 26 de xaneiro de 2021 ou para aqueles tamén afectados polas restricións sen que estas supuxeran o seu peche.