A voceira popular en Monforte recorda que o seu grupo criticou que se licitase nun mesmo lote a atención ao Centro do Viño, a Oficina de Turismo, ás visitas á Torre da Homenaxe e a Oficina do Peregrino. Consideraban ademais que o orzamento de licitación era moi baixo. Di que no PP tiñan coñecemento de que moitas empresas estaban interesadas en participar pero renunciaron á vista das condicións do concurso.
Asegura Katy Varela que a licitación, con tan pouco orzamento non interesou ás empresas, presentándose só Nova Santiago UTE. Por outra parte, Varela di que a presentación do recurso, pola actual empresa encargada do Centro do Viño, contra as bases do concurso coincide, na súa exposición, con varios dos argumentos manifestados no seu día polo PP. “Por un lado, porque non prevé a subrogación dos traballadores, pese a que está recollida como obrigatoria no convenio. Indica neste sentido que podería haber unha vulneración do artigo 130 da lei de contratos del sector público. Tamén se destaca, como no seu día sinalou o PP, que o importe do orzamento non é suficiente para cubrir os gastos.”
Desde o PP aseguran estar preocupados polo que poida ocorrer con este concurso e coa atención aos centros aos que afecta. “Preocúpanos moito a situación dos traballadores, un problema especialmente chamativo nun municipio no que o alcalde foi sindicalista. Estamos diante dun concurso que pode ser impugnado e iso pode ter consecuencias serias para os intereses da cidade.”