Os socialistas de Bóveda denunciaban que o alcalde anunciara que o Concello ía subvencionar o 100% do imposto de construción para a rehabilitación interior e exterior, reconstrución ou construción de obra nova en vivendas unifamiliares. E insistían “Resulta bastante casuístico, que tres meses despois deste anuncio o propio Alcalde presente un proxecto para a realización dunha nova construción na vila. A través da acta da Xunta de Goberno Local do día 24 xuño comprobamos que o rexedor vaise beneficiar dunha axuda económica, impulsada polo Concello para a contratación da súa nova vivenda por un importe de 3.500 euros”, advirten.
Desde o concello aclaran que aínda non existe un regulamento para esas subvencións, “polo que ninguén as puido solicitar polo de agora, tampouco o rexedor.” Sinalan desde o concello que este ano pedíronse varias licenzas de obra, se ben as subvencións aínda non se poden solicitar, ata que se aprobe o regulamento e se estableza que tipo de actuacións se van poder acoller. “Despois será decisión de cada persoa solicitalas ou non e, posteriormente, resolverase a súa concesión sempre e cando cumpran os requisitos,” conclúen desde o concello de Bóveda.