O IES Lama das Quendas de Chantada perde 7.5 docentes respecto do curso pasado e perde 3 docentes en relación ao cupo de 2012-2020 sen calquera xustificación.
Segundo Por Chantada as consecuencias deste recorte porán en risco a saúde da comunidade educativa, xa que será imposible manter as gardas fixadas no Protocolo COVID do centro, sobretodo ao comezo da xornada e dos recreos. “Cun recorte tan acusado do profesorado auméntase o risco de que o alumnado non respecte as normas e que poda darse transmisión na comunidade educativa. Tamén os recortes afectarían de cheo á equipa COVID do centro, que precisa moitas horas de dedicación.”
A candidatura veciñal Por Chantada parécelle especialmente negativo a perda da ESA, ao consideralo un servizo educativo esencial en todo o partido xudicial. “As persoas adultas sen a ESO terían que desprazarse ata Monforte ou Lalín cando moitas veces o perfil do alumnado é migrante ou persoas con baixos recursos e dificuldades para se desprazar. Novamente, a obsesión do PP polos recortes mostra a falta de sensibilidade coas persoas e cos servizos para o medio rural.”
Por Chantada condena estes recortes que se suman á amortización dunha praza de administrativo mais unha praza de limpeza que non se repón e que poderían obrigar a fechar o centro en agosto, algo que non acontecía tampouco durante todos estes anos. “Non se pode facer política desde un despacho de Santiago ignorando a a realidade do rural e os dados e a información que dan os centros. O PP debe abandonar a súa economía planificada de recortes draconianos a base de planos quinquenais que baleiran o rural,” aseguran.
Demandan desde Por Chantada que os alcaldes da comarca fagan unha fronte común para garantiren a saúde da comunidade educativa e unha atención educativa de calidade que atenda á diversidade e ao sentido común.