¿Ministerio e Consellería venden o campo galego?

Segundo avanza o tempo confírmanse os piores temores, tal e como sinala o Sindicato Labrego Galego, pois as propostas para a nova PAC presentadas polo Ministerio de Agricultura, Pesca e Alimentación "son un absoluto desastre para o noso campo."

Vacas

Interior Galego Vivo lembra que hai meses que advertiran que Galicia se xogaba moito coas negociacións da PAC e que era incomprensible que os partidos galegos non tivesen isto no centro da súa axenda. A este respecto o SLG achega cifras concretas que exemplifican a discriminación. “A Galiza declara unhas 286.000 hectáreas en pastos permanentes na rexión 403, son 13,5 millóns de euros/ano. Se 100.000 desas hectáreas se consideraran na rexión 503 suporían uns 19,8 millóns de euros/ano, é dicir, só en 100.000 hectáreas, esta situación supón unhas perdas para o noso país de 6,3 millón de euros ao ano,” sinalan.

Desde IGV explican, “unha granxa que teña 20 hectáreas de pasto na Galiza cobraría 3.381,30 euros de axuda básica e redistributiva, mentres que a mesma facenda na mellor rexión de pastos da cornixa cantábrica cobraría 5.183,86 euros.”

Desde IGV aseguran que é habitual que Madrid se esqueza do interior de Galicia e culpan á Consellería de Medio Rural de “venderlle aos urbanitas “aldeas modelo” e outas estafas a cargo do contribuínte como os “plans” para a Ribeira Sacra que non de traducen en nengunha mellora de servizos ou oportunidades para viver aquí.”

IGV asegura que PP e PSOE venden o campo galego e sacrifican sectores inteiros (leite, carne…), que nen teñen prezo xusto nen subvencións, mentres aumentan as exixencias burocráticas e os custos de tramitación.
“Unha política agraria común claramente discriminatoria, que está ao servizo da agroindustria e do latifundio, que seguirán recebendo  cantidades millonarias, ao tempo que abandona a agricultura familiar, a xente moza, penaliza o extensivo e ecolóxico, exclúe modelos diversificados e o viñedo… Unha PAC contra os profesionais da actividade agraria e gandeira, e contra un medio rural vivo.”

Segundo IGV, a PAC debería servir para apoiar o campo e a ordenación xusta do territorio, apoiando as pequenas e medianas explotacións, a incorporación da mocidade e o cooperativismo, a produción de alimentos de calidade, o coidando do medio ambiente e a biodiversidade…

DEIXAR UN COMENTARIO

Please enter your comment!
Please enter your name here