Esta formación política encabezou as protestas sociais sobre este tema e segue a pedir a reposición do terceiro médico. Lembran os nacionalistas que “concellos da nosa contorna con menos poboación ca nós teñen tres médicos e a nós déixannos con dous, e con promesas baleiras. No canto de porfiar e esixir esta terceira praza, o alcalde está agora ocupado da procura de terreos para un novo centro médico. Algo incomprensible para a nosa formación que non acaba de entender cal é o criterio do goberno municipal para priorizar o cemento por riba dos recursos humanos e a atención sanitaria pública e de calidade”, sinalan desde o BNG.
“Os datos certos son que perdemos dúas profesionais en seis meses, e a consellaría de Sanidade pretende tapar esta enorme carencia co anuncio da construción dun novo centro de saúde. De novo o PP prioriza o cemento sobre as persoas’, lembra a portavoz municipal do BNG, RosaAna Prieto Florines quen defende que o urxente e necesario é dotar de persoal o actual centro antes ca ningunha outra cousa.
Anuncian novas accións institucionais no municipio e no parlamento galego para o mes de xaneiro coa intención de dar cobertura definitiva a esa terceira praza, e avisan: “É unha decisión política deixarnos sen el, polo que os únicos responsables da situación son os gobernos do PP no municipio e na Xunta, e tamén son os únicos con capacidade real para solucionar este problema’ sentencian dende o BNG, primeira forza da oposición no municipio de Pantón.