A iniciativa de Esperta Monforte aséntase en que a axenda 2030 está a loitar co cambio climático e que “todos deberiamos traballar para garantir o acceso a unha enerxía asequible, segura, sostible e moderna para todas as persoas”, sinalan.

Algunhas das metas de aquí ao 2030 son aumentar considerablemente a proporción de enerxía renovable no conxunto das fontes enerxéticas, optar polas enerxías limpas, a eficiencia enerxética e promover os investimentos en tecnoloxías e infraestruturas limpas.

Para avanzar neste camiño Esperta Monforte leva a pleno unha moción para instalar paneis solares de autoconsumo nos edificios públicos de Monforte e lamentan que non se teñan tomado este tipo de medidas nas recentes melloras das naves do campo da feira e no edificio multiusos. Piden agora que se aproveite para facer este tipo de instalacións na obra que se vai acometer na piscina municipal, vendo a instalacións dos paneis como un investimento de futuro.

Esperta Monforte pide na súa moción comezar os estudos e traballos para a elaboración dun plan de colocación deste paneis solares para edificios municipais.