O BNG de Monforte leva a pleno a mellora da rede de abastecemento de auga

As reiteradas avarías que se producen nas tubaxes do abastecemento de auga potable en Monforte, poñen de manifesto o deterioro da rede dun servizo fundamental para a cidadanía, sinalan os nacionalistas.

Emilio Sánchez, concelleiro BNG Monforte. Foto: BNG

Nas últimas datas veñen de producirse varias avarías nos mesmos puntos (zona mercado gandeiro, estrada de Reigada, Rúa escultor Francisco Moure). Desde o BNG, consideran que a orixe destes continuos cortes e faltas de presión, están motivados polo obsoleto do sistema de tubaxes, “moitas delas aínda de fibrocemento, incapaces de soportar unha presión axeitada aos requirimentos das necesidades actuais do servizo.”

En palabras do portavoz municipal do BNG, Emilio Sánchez, “non se pode permitir que cada dúas por tres, en pleno século XXI, teñamos un corte de auga na cidade”.

“Cando se fala de mellorar servizos, non se debería limitar a un simple asfaltado, algo que lucirá moito pero, no fondo, non fai máis que esconder un problema realmente estrutural, como é o pésimo estado do sistema de abastecemento de auga pública, un servizo básico”, comenta o portavoz nacionalista.

DEIXAR UN COMENTARIO

Please enter your comment!
Please enter your name here