“Inta, un goberno dócil coas grandes empresas e indolente cos veciños”, aseguran os socialistas chantadinos

No pleno extraordinario solicitado pola oposición para esixir a apertura dun expediente a Viaqua, empresa concesionaria do servizo de augas en Chantada, Inta rexeitaba a apertura do expediente.

Billa auga / Europa Press

Informes dos servizos municipais de Chantada recollen que Viaqua, empresa concesionaria do servizo de abastecemento, saneamento e depuración de augas deste concello, estivo vendendo auga en cisternas, actividade para a que non disporía de competencias. O informe recolle textualmente “A actuación descrita non se axustaría á legalidade prevista nos pregos, en canto a que a concesionaria non pode vender a auga nin permitir o seu consumo a un terceiro, salvo nos supostos de alta de suministro con nova acometida e contador.

Nesta situación PsdeG-PSOE, PP e Por Chantada solicitaron a celebración dun pleno extraordinario esixindo a apertura dun expediente a Viaqua, pero a iniciativa foi rexeitada polo equipo de goberno. Para os socialistas este proceder contrasta coa rigurosidade coa que se trata, por exemplo, os atrasos do IBI, o que leva ao PSOE a afirmar que Inta ” é un goberno dócil coas grandes empresas pero indolente cos veciños e veciñas máis humildes. Esta laxitude de Manuel Varela é reiterada, xa que VIAQUA é herdeira da tristemente famosa AQUAGEST, aquela á que xa se lle concedera unha máis que cuestionable prórroga da concesión do servizo incluindo a chapuceira obra da Rúa Xoán XXIII.”

Segundo os socialistas e Por Chantada, a apertura do expediente é un mecanismo para realizar a investigación detallada do acontecido e tomar as medidas sancionadoras que corresponda, pero non será desde a administración local que se tome a iniciativa; si se acordou por unanimidade derivar o expediente a Augas de Galicia e a Confederación Hidrográfica Miño-Sil para solicitar un informe sobre a posibilidade de sancionar a Viaqua.

DEIXAR UN COMENTARIO

Please enter your comment!
Please enter your name here