Piden que a Xunta “recoloque” os alumnos do Frei Luis noutros centros mentres non rematan as obras

Na xornada deste xoves só acudiron a clase 30 dos 367 estudantes matriculados. Pais e nais tachan de "irresponsable" á Xunta por permitir a actividade lectiva nun espazo con "puntais, cravos oxidados e táboas no chan".

CEIP Frei Luís de Granada, en Sarria | Páxinas Galegas

Só 30 nenos dun total de 367 acudiron a clase este xoves no colexio Frei Luís de Granada, en Sarria. Os pais dos pequenos rexeitan levar os seus fillos desde o pasado luns polo estado no que se atopa o inmoble, “totalmente apuntalado” debido ás obras. Por este motivo, os proxenitores pediron á Xunta de Galicia que “recoloquen” os seus fillos noutros centros mentres continúan os traballos e as actuacións no colexio.

Así o trasladou Javier Pico, que tamén avanzou a convocatoria dunha manifestación a partir das oito e media. “Temos falta de información por parte da consellería de Educación, e a día de hoxe non existe un informe definitivo de cal é o estado real do centro. O único que nos din é que é seguro. Pero non sabemos como din isto se a día de hoxe non hai un informe definitivo”, criticou.

“IRRESPONSABILIDADE” DA XUNTA

Neste sentido, lamentou a actitude “opaca” da Xunta e censurou que non se pode estar “nun centro público, con nenos de seis anos, rodeados de puntais, con cravos oxidados e táboas no chan”. Tachan de “irresponsable” á Xunta por recomendar que continúe a actividade lectiva nesas aulas.

Pico reiterou a necesidade de “recolocar aos pequenos noutros colexios” e de non os traer de volta ata que “sexa seguro”, unha vez feito un estudo completo das deficiencias do centro.

DEIXAR UN COMENTARIO

Please enter your comment!
Please enter your name here