A Mostra de Viños de Pantón preséntase aos medios

Este venres deuse a coñecer a programación dunha das feiras do viño ‘pechacancelas’ da Ribeira Sacra na aldea da Míllara, no corazón da Ribeira Sacra e a carón do canón do Río Miño. A pregoeira será a artista galega Eva Iglesias.

Presentación da Mostra de Viños nunha adega da Míllara / Concello de Pantón

As Feiras do Viño da Ribeira Sacra están collendo xa un bo costume, darse a coñecer con presentacións en enclaves emblemáticos dos concellos que as organizan. E así foi como fixo tamén o Concello de Pantón este venres levando á prensa ao lugar da Míllara, unha aldea rehabilitada que goza dunha localización e vistas privilexiadas respecto ao canón do Miño.

Deuse a coñecer o cartel do evento, a programación basicamente porque a imaxe gráfica, obra do deseñador monfortino Xosé Carlos Quiroga, corre xa polas redes sociais dende hai días.

Como empeza a ser costume neste evento, o pregoeiro/a escollido/a destaca por ter relevancia mediática dentro do panorama cultural e artístico galego e este ano non podería ser menos. A pregoeira será Eva Iglesias, a popular colaboradora de Land Rober, que nestes últimos anos deu o salto ao cinema colaborando nalgunhas producións televisivas, e tamén á TVG como presentadora dalgún programa. Iglesias vén do mundo das orquestras, destaca como cantante e dende hai uns anos descubriuse como colaboradora cómica nos diferentes sketchs nos que participa no “late night” con máis audiencia da galega.

A XXVI Mostra dos Viños da Ribeira Sacra de Pantón empezará o día 17, Día das Letras Galegas, e rematará o domingo 19 de maio. Como en edicións anteriores, dentro da programación encáixase a Festa da Empanada o sábado 18.

O alcalde, José Luis Álvarez, e adegueiros, na Míllara / Concello de Pantón

Ademais do viño, presente con oito adegas do lugar, destaca o programa polos interesantes concertos, este ano a cargo dos grupos Broken Peach, La Fuga e Señor Aliaga, e das charangas Louband, de Sarria, Brexit, Europa, Fuego e Támega.

O pregón, a cargo de Eva Iglesias, será o domingo ás 12.30 h no recinto feiral, que como cada ano se ubica na Praza do Concello.

DEIXAR UN COMENTARIO

Please enter your comment!
Please enter your name here