A información do tempo máis accesible cunha nova pantalla en Monforte

O Concello instalou unha pantalla no Campo de San Antonio que permitirá coñecer máis información sobre o tempo e a calidade do aire.

Colocación da pantalla de información / Concello de Monforte

Os operarios do Concello de Monforte instalaron o pasado xoves día 27 unha pantalla que permite coñecer información pública de metereoloxía e calidade do aire. Está situada no Campo de San Antonio, xunto ao Concello. En caso preciso, tamén ofrecerá a posibilidade de dar avisos á cidadanía ante posibles fenómenos metereolóxicos extremos ou casos de mala calidade do aire por contaminación.

O Concello aclara que a decisión de ubicala nese punto débese a que, ademais de dar información aos veciños, tamén pode proporcionarlle datos de interese aos peregrinos do Camiño de Inverno. O Alcalde de Monforte, José Tomé, sinalou que estas instalacións “son un logro importante e colocamos as Monforte no mesmo ranking que o resto das cidades galegas en canto a información meteorolóxica se refire”.

Trátase dun dos tres elementos que o Executivo local está a instalar coa colaboración de Meteogalicia. Xa no mes de marzo se instalou unha estación metereolóxica na Pinguela e proximamente colocarase unha cámara web na muralla xunto á porta de acceso á Torre da Homenaxe.

Pantalla de información metereolóxica en Monforte / Cedida

DEIXAR UN COMENTARIO

Please enter your comment!
Please enter your name here