O Concello de Sarria organiza, coa coordinación do mago local Roberto Lolo, este prestixioso festival de maxia que dende hai catorce anos pon a esta vila no punto de mira dos amantes do ilusionismo cunha chea de espectáculos que se reparten por diferentes emprazamentos públicos e locais hosteleiros de Sarria.
Hoxe, 22 de agosto, comeza a acción. Ás 17:00 h. o Mago Pollo estará na Residencia de Anciáns e a esa mesma hora haberá unha conferencia exclusiva para magos na terraza Meigallo a cargo de Giancarlo Scalia. A continuación, máis espectáculos; no Paseo do Malecón ás 18:30 h. con Luigi Ludus e ás 19:45 h. na terraza O’ Chanto co Mago Paco. Pola noite, ás 22:45 h. a Sala Buril acollerá unha gala con Javi Rufo, Samuel Moreno, Dani Polo, Giancarlo Scalia e Dania Díaz.
Para o venres, máis espectáculos dende as 17:00 h., coa estrutura do día anterior pero cambiando os escenarios e a combinación de magos/as.
De cara á fin de semana, e tamén coa estrutura dos días anteriores –conferencia, maxia en diferentes emprazamentos e gala nocturna- a novidade é que haberá un show ás 13:00 h. con maxia infantil. O sábado na Praza de Santa Marina e o domingo na Praza do Concello.
Como peche a estes catro días de maxia o domingo ás 22:30 h. realizarase unha ‘Gran Gala Final” na Praza da Vila presentada polo anfitrión Roberto Lolo e coa intervención de Mago Joel de Cuba, Dani Polo, Samuel Pons, Dania Díaz, Nano Arranz, David Díaz e Raúl Camaguey.
Dos 23 magos/as asistentes a esta edición, e sen desmerecer a ningún, poderiamos destacar a Giancarlo Scalia, mago italiano especializado en maxia de preto, Luigi Ludus, mago con man para o público familiar e que fai ‘maxia cantada’ ou Tomás San Juán, que pasou por Got Talent na recente edición. Outros cracks como Miguel ángel Gea ou o Mago Joel de Cuba repiten presenza en Sarria.
Roberto Lolo, coordinador do evento está moi satisfeito co cartel e con ganas xa de pasalo ben e facelo pasar ben a todos os veciños, veciñas e visitantes de Sarria. O pasado ano fixémoslle unha entrevista que podedes ler aquí se queredes saber máis detalles deste Festival de Maxia Vila de Sarria.