‘Lugo Termal’ abre o prazo de solicitudes

A Deputación de Lugo ofrecerá este ano arriba de 1.350 prazas no Balneario e Termas de Lugo, o Hotel Balneario Río Pambre de Palas de Rei e o Hotel Balneario de Augas Santas de Pantón.

Sesión de balneario. Foto: Deputación de Lugo

Este exitoso programa de termalismo está dirixido aos maiores de 55 anos que estean empadroados na provincia e a solicitude poderá realizarse a partir das 00.00 horas do martes 8 de setembro, tamén a través da páxina web da propia Deputación de Lugo.

Dende hai xa oito anos o organismo provincial favorece, con este programa, o benestar social e a saúde dos maiores, ademais de impulsar o ‘turismo provincial’. Nesta edición ofrece 1.350 prazas (1.113 con estancia e 238 sen estancia) con descontos de máis de 60 euros para recibir terapias mineromedicinais, ata xuño do 2020. A atención e servizo aos usuarios e usuarias resulta excelente, partindo dun control médico e recoñecemento previo ata a aplicación das técnicas termais máis novidosas, e como detalle a maiores tamén se pode obter un informe médico ao remate da estancia a petición do usuario ou usuaria.

Os beneficiarios e beneficiarias das prazas poderán acudir cun acompañante, que tamén terá a posibilidade de gozar destes descontos aínda non tendo máis de 55 anos. Outra das características diferenciais do programa de termalismo provincial é que permite o acompañamento de persoas con discapacidades físicas, psíquicas ou sensoriais, garantindo o seu acceso e goce dos tratamentos termais.

Modalidades

A modalidade con estancia contempla seis días e cinco noites en pensión completa, o prezo a pagar polos usuarios e usuarias é de 189,50 euros. Inclúe servizo de cea e aloxamento o día de entrada e o servizo de almorzo e xantar o día de saída, podéndose alternar por servizo de xantar e cea o día de entrada e almorzo o día de saída, acordando previamente co balneario. Será en habitacións de uso compartido (os usuarios que soliciten unha individual, se o balneario ten dispoñibilidade, aboarán a diferenza correspondente aos prezos establecidos). Aplicaranse un mínimo de 15 técnicas termais, agás que por razóns médicas xustificadas se desaconsellen, e haberá un programa de animación sociocultural de luns a xoves.

A modalidade sen estancia contempla dez días (de luns a venres) e o prezo a pagar polos usuarios e usuarias é de 200 euros. Inclúe 30 técnicas termais como mínimo, agás que por razóns médicas xustificadas se desaconsellen.

DEIXAR UN COMENTARIO

Please enter your comment!
Please enter your name here