Monforte é un patrimonio ferroviario único en España

O Muferga, Museo dos Ferrocarrís de Galicia, ven de celebrar reunión do seu Padroado para avanzar os próximos proxectos a desenvolver. Con sede en Monforte recibe anualmente unha media de 15.000 visitantes.

Muferga xuntanza / Delegación Territorial

A xuntanza serviu para abordar o remate das obras de restauración dunha sección da rotonda ferroviaria e posta en funcionamento dos tres gatos hidráulicos que ata o momento estaban sen uso no Muferga. Recuperarase así un elemento moi destacado do patrimonio ferroviario do museo, con máis de 80 anos de antigüidade, que permitirá ampliar os espazos dedicados ao mantemento e reparación das locomotoras de vapor.

Tan só hai dúas instalacións semellantes en toda España, en Vilanova la Geltrú e Santander, pero de menor envergadura que a monfortina, que forma parte do patrimonio industrial europeo.

No plan de actividades tamén está previsto traballar na reposición dunha vía morta e outra de escape para entrar na rotonda e trasladar desde o Museo Camilo José Cela en Padrón dous tractores diésel de época para restaurar e poñer de novo en servizo, cando sexa factible.

Para este curso o Muferga contará cun orzamento de 116.000 euros. Renovouse o compromiso de incorporar ingresos por importe de 30.000 euros da Xunta de Galicia, 21.000 euros por parte da Deputación de Lugo e Ourense e, 8.000 do Concello de Monforte de Lemos.

Visita Muferga / Delegación Territorial

DEIXAR UN COMENTARIO

Please enter your comment!
Please enter your name here