Liberdade para o profesor detido en Monforte por supostos abusos sexuais

Axentes da Policía Nacional detiveron no municipio de Monforte de Lemos a un home de mediana idade profesor de música logo de ser denunciado por supostos abusos sexuais e delito de violencia sobre a muller

Coche da policía nacional. Fonte: Europa Press

O Xulgado de Instrución Número 2 de Monforte  deixou en liberdade ó profesor de música detido tras denuncias de exalumnas, investigado por un suposto delito de violencia sobre a muller.

Segundo informaron fontes xudiciais, o xulgado decretou, así mesmo, tras pasar a disposición xudicial este venres, unha orde de protección para unha das denunciantes.

A causa séguese por un suposto delito de violencia sobre a muller e, eventualmente, deberase dilucidar se existe un delito contra a liberdade sexual segundo puntualizaron as mesmas fontes.

Como informou o XdL foi a Policía Nacional quen detivo en Monforte de Lemos a un home de mediana idade profesor de música tras ser denunciado por supostos abusos sexuais.

A detención produciuse a raíz da denuncia de varias alumnas que ían ás súas clases por feitos supostamente sucedidos hai xa uns anos cando aínda eran menores de idade.