No 2009 a Deputación procedeu á mellora do primeiro tramo de acceso ao Pazo de Tor, que é o que enlaza a estrada provincial LU-P-3207 coa da Xunta, a LU-617. Agora reactívase este proxecto e completarase co arranxo da pista, ata chegar ao aulario do Pazo de Tor, adicando ao proxecto 600.000 euros. Dotarase, tanto ao enlace coa LU-617 como a todo o tramo completo de máis 3 quilómetros, do pavimento definitivo a base de mestura asfáltica en quente.
A actuación dentro da Finca consistirá nun novo vial ata o aulario, con novos accesos, unha rotonda para cambiar o sentido da circulación e estacionamentos para coches e autobuses. “Son unhas obras que terán un prazo de execución de 6 meses e está previsto que poidan comezar no verán”, explica o Presidente da Deputación.
Tomé Roca destacou que esta é unha obra importante porque “queremos impulsar e poñer en valor a finca de Tor”. O Pazo “xa é un referente para o noso turismo. É unha peza clave na Rede Museística Provincial que debemos espremer aínda máis, co fin de potenciar o noso patrimonio. Estamos ante un testemuño privilexiado do modo de vida da nobreza na Galicia da Idade Moderna”, afirmou.