Vox volve protagonizar outra polémica máis, e desta vez, enreda nela á xornalista natural de Monforte, Julia Otero. Na conta de Twitter do partido de extrema dereita, a dirixente de Vox, Rocío Monasterio, publicou un vídeo dirixido á presentadora de Onda Cero coas seguintes palabras: “Ola, Julia Otero, teño unha mensaxe para ti”. 

Nel, Monasterio aparece no campo, diante dun tractor, e acusa a xornalista de “non ter saído da cidade na súa vida”: “Esta é unha mensaxe para todos os urbanitas tipo Julia Otero que non se decataron aínda de que o tractor é diésel e que se atreven a criticar a Vox, e é que non se decatan, porque non saíron das cidades na súa vida e hoxe estamos aquí coa xente do campo. Convido que veñan ver aos gandeiros, aos agricultores, aos que teñen touros, aos cazadores… e que deixen de soltar os seus mantras nos medios de comunicación, ese neomarxismo e esa relixión que nos queren impor e que de verdade estean coa xente que coida o medio ambiente. Iríalles moito mellor”, relata no vídeo de 30 segundos.

Hola, @julia_otero 🤗🤗 Tengo un mensaje para ti ⬇ pic.twitter.com/vgZrmvEX74

— Rocio Monasterio (@monasterioR) December 11, 2019

Prendida a chama, Julia Otero decidiu non calar perante estas críticas e axiña contestou á dirixente de Vox con outra mensaxe, tamén a través de Twitter. De maneira taxante, afirmou que Monasterio “ten o mesmo coñecemento sobre min que sobre a emerxencia climática”. Julia Otero recordou na súa contestación que naceu nunha aldea de 20 habitantes – en referencia ao lugar da Penela (en Monforte de Lemos) e que é “filla e neta de campesiños galegos, expulsada da miña terra – como tantos emigrantes – polo réxime que vostede venera”. “Descúlpoa, noto que lle fai ilusión ver un tractor de preto”, rematou dicindo.

¡Menuda empanada! ¿se referirá @julia_otero a mis “venerados” castristas? 🤔🤔 https://t.co/iyiIAqP0Ip

— Rocio Monasterio (@monasterioR) December 11, 2019

Non quedou aquí a cousa. Monasterio quixo ter a última palabra e non dubidou en volver respostar a esta nova publicación de Otero. “Menuda empanada. Refirirase aos meus ‘venerados’ castristas?”. Outros tweets que se entrecruzan polo medio enlean aínda máis a polémica ao asegurar que o lugar de nacemento da xornalista ten 20.000 habitantes e non 20 persoas, como ela afirmara por redes. A diferenza entre municipio e aldea semella que non está clara de todo. Se ben é certo que Monforte, no seu conxunto, anda ao redor dos 18.000 habitantes, a aldea concreta na que naceu Julia Otero, A Penela, non supera as 20 persoas, como ben dixera a xornalista.