Sempre se dixo que os momentos difíciles fan saír fóra o mellor e o peor de cada un de nós, e a crise do coronavirus é unha nova oportunidade para comprobalo.
Estes días estamos asistindo a comunicados oficiais dos concellos das comarcas do sur de Lugo nos que se están organizando para ofrecer servizos de entrega a domicilio de alimentos e medicamentos a persoas que vivan ailladas e/ou que teñan limitada dalgún xeito a mobilidade. Deste xeito, ademais, evítanse posibles contaxios.
O Concello de Láncara, por exemplo, activou un servizo de “medicamentos á casa” no que despois de chamar ao Centro de Saúde e pasar dende aquí encargo ás farmacias estas informarán ao Concello que será o encargado de facer a entrega aos destinatarios/as.
Outros concellos -dos que temos constancia- como Sarria, Sober, Quiroga, Chantada ou A Pobra do Brollón tamén ofrecen o servizo de entrega domiciliaria de produtos de primeira necesidade e medicamentos, apoiándose en persoal de protección civil, servizos de emerxencias, policía local e incluso persoal do propio concello.
Paralelamente, organizacións como Cruz Vermella, tamén está ofrecendo asistencia telefónica para atender á considerada como poboación vulnerable ofrecéndolles información e preguntando polas súas necesidades. Neste segundo caso, se entre elas están as xestións de compra de alimentos e medicamentos tamén están ofrecendo axuda.
Outro exemplo, neste caso no movemento asociativo, témolo na asociación monfortina Náufragos do Paradiso que creou este pasado domingo un grupo de whatsapp de voluntarios e voluntarias para facer estas tarefas que referimos. Falamos con Adrián Casanova, un membro da mesma, e cóntanos que activaron o grupo pensando que podían ser de gran utilidade para xente de Monforte, “ao sermos xente nova e non ser factor de risco pensamos que podiamos axudar”, refire. Así naceu, pois, un grupo de acción composto por unhas 20 persoas voluntarias. Algúns dos integrantes e membros da asociación son estudantes que volveron a Monforte despois de suspenderse a actividade escolar e universitaria, e ademais de ganas teñen gran marxe de dispoñibilidade.
Adrián indícanos, respecto ao funcionamento do grupo, que a Cruz Vermella é quen recibe a chamada na que se demanda o servizo e dende aquí xa contactan co grupo de acción creado para que se derive o encargo á persoa voluntaria dispoñible. “Estes días na Cruz Vermella andan bastante saturados e ter máis xente da que tirar é importante”, dinos tamén Adrián.
Para formar parte deste “Grupo Monfortino de Voluntariado Horizontal”, como lle chaman eles, pódese contactar coa asociación Náufragos do Paradiso, co colectivo FEMforte e tamén coa Cruz Vermella de Monforte no teléfono 982 402549.
