Todo semellaba tranquilo nas Terras do Courel e en dous días, rematando este fatídico mes de marzo, o Concello de Folgoso informaba nun comunicado público da existencia de tres positivos por coronavirus. O primeiro detectouse o luns 30 e este martes 31 apareceron dous casos máis.
Os contaxiados, segundo información oficial do concello, están nas súas casas gardando confinamento e seguindo o protocolo establecido polas autoridades sanitarias.
O equipo de goberno municipal aproveita o comunicado para trasladar ánimo e unha rápida recuperación ás persoas diagnosticadas, ao tempo que insiste na necesidade de cumprir as normas e extremar as precaucións por parte de toda a veciñanza. Así mesmo, lembra que para atender dúbidas ou aspectos asistenciais relacionados co coronavirus pódese chamar ao 900 400 116 e para necesidades de abastecemento de medicamentos e alimentación contactando a través do 982 43 30 01.